Á vefsíðu EducationUSA, sem er opinber upplýsingaveita bandarískra yfirvalda um framhalds menntun í Bandaríkjunum, er að finna margvíslegar leiðbeiningar fyrir þá sem íhuga grunnháskólanám í Bandaríkjunum.
Hér fyrir neðan má finna gagnlegar upplýsingar í 5 skrefum um skólaval, fjármögnun náms, umsóknir, dvalarleyfi og annan undirbúning. Hér fyrir neðan má finna tengla á EducationUSA. Neðar á síðunni eru upplýsingar um tveggja ára háskóla (community colleges), þar sem eingöngu er hægt að taka fyrstu tvö námsárin, en þessir skólar geta verið áhugaverður valkostur til að hefja háskólanám.
Hægt er að hefja grunnnám í Bandaríkjunum með því að ljúka fyrstu tveimur árum háskólanáms í tveggja ára háskóla, svokölluðum „community college“, og færa sig svo yfir í hefðbundinn fjögurra ára háskóla og taka seinni tvö árin þar. Þetta er talin örugg og góð leið ef umræddir skólar hafa gert milli sín samning sem nefndur er „articulation agreement“. Ef slíkur samningur er fyrir hendi á nemandinn rétt á því að láta færa sig yfir í samstarfsháskólann að tveimur árum liðnum, að því tilskyldu að nemandinn standist ákveðnar lágmarkskröfur. Tveggja ára háskólar eru oftast miklu mun ódýrari skólar en fjögurra ára háskólar. Skólagjöld þar eru oft ekki nema fimmtungur af skólagjöldum annarra háskóla.
