Aukin þátttaka Íslands í Fulbright Arctic Initiative III
![](https://fulbright.is/wp-content/uploads/2020/10/Fulbright-Glacier.jpeg)
Fulbright Arctic Initiative (FAI) er þverfaglegt 18 mánaða rannsóknarverkefni með þátttöku allra ríkja Norðurskautsráðsins og hefur Fulbright stofnunin umsjón með verkefninu fyrir Íslands hönd. Markmið FAI er að efla rannsóknarsamstarf á Norðurskautinu og auka þekkingu á víðum grunni. Tveir íslenskir fræðimenn hafa tekið þátt í fyrri lotum FAI, Dr. Bjarni Már Magnússon frá HR í fyrstu lotunni og Dr. Lára Jóhannsdóttir frá HÍ í annarri lotu. FAI er einstakt tækifæri fyrir öfluga fræðimenn til að styrkja tengslanetið, taka þátt í alþjóðlegu samstarfi og auka gagnkvæman skilning á milli Norðurskautsþjóða.
Þriðja lota FAI hefst á næsta ári. Í ljósi jákvæðrar reynslu af þátttöku í fyrri verkefnalotum hefur Fulbright stofnunin, í samráði við mennta- og menningarmála-, utanríkis- og umhverfisráðuneytið, ákveðið að efla þátttöku Íslands í þriðju lotunni.
Ráðuneytin þrjú hafa í sameiningu lagt til fjármagn sem gerir stofnuninni kleift að styrkja tvo íslenska fræðimenn til þátttöku í FAI III í stað eins. Belinda Theriault, framkvæmdastjóri Fulbright stofnunarinnar, sagði við þetta tækfæri að framlag og árangur fyrri þátttakenda hefði lagt grunninn að frekari og viðameiri þátttöku Íslands í FAI III. Um leið og hún þakkaði ráðuneytunum þremur fyrir þeirra framlag benti hún á að mikil viðurkenning væri fólgin í því að ríkisstjórnin vilji efla þátttöku Íslands í Fulbright samstarfi sem styrkir alþjóðlegt og þverfaglegt vísindasamstarf á norðurslóðum.